ఎవుసం టీవీ,జఫర్గడ్ (జనగామ): వాతావరణం ఎప్పుడు ఎలా మారుతుందో తెలియని పరిస్థితుల్లో సంప్రదాయ సాగు విధానాలపై ఆధారపడటం రైతులకు ఇబ్బందులు తెచ్చిపెట్టే అవకాశముందని వ్యవసాయ శాస్త్రవేత్తలు హెచ్చరించారు. మారుతున్న పరిస్థితులకు తగ్గట్టుగా పంటల యాజమాన్యాన్ని ఎప్పటికప్పుడు మార్చుకుంటూ ముందుకెళ్లాలని సూచించారు.జనగామ జిల్లాలో పంటల పరిస్థితిని తెలుసుకునేందుకు జిల్లా రైతు విజ్ఞాన కేంద్రం కోఆర్డినేటర్ డాక్టర్ వి. రమ్య,వరంగల్ ప్రాంతీయ వ్యవసాయ పరిశోధన కేంద్రం శాస్త్రవేత్త డాక్టర్ పి. గోన్యనాయక్ శనివారం క్షేత్ర పర్యటన చేపట్టారు. జఫర్గడ్,స్టేషన్ఘన్పూర్ మండలాల పరిధిలోని తీగారం,సూరారం,చాగల్లు, రాఘవపూర్ గ్రామాల్లో పర్యటించి వివిధ పంటలను పరిశీలించారు.వరి,పత్తి,మొక్కజొన్న,వేరుశనగ, నువ్వులు,కందులు, కూరగాయల పంటలను పరిశీలించిన శాస్త్రవేత్తలు.. పంటల ప్రస్తుత దశ,సాగు విధానం,రైతులు ఎదుర్కొంటున్న సమస్యలపై ఆరా తీశారు. క్షేత్రస్థాయిలోనే రైతులతో చర్చించి, ఆయా పంటలకు అనుగుణంగా చేపట్టాల్సిన చర్యలను వివరించారు.వాతావరణ మార్పులు పంటలపై ప్రభావం చూపుతున్న నేపథ్యంలో రైతులు అప్రమత్తంగా ఉండాలని,వ్యవసాయ శాఖ,శాస్త్రవేత్తలు సూచించే యాజమాన్య పద్ధతులను సకాలంలో అమలు చేయాలని వారు కోరారు. పరిస్థితిని బట్టి సాగు నిర్ణయాలు తీసుకోవడం ద్వారా అనవసర పెట్టుబడులు, పంట నష్టాన్ని కొంతమేర నివారించవచ్చని తెలిపారు.ఈ క్షేత్రస్థాయి పర్యటనలో మండల వ్యవసాయ అధికారి చంద్రశేఖర్కుమార్, ఏఈఓలు, రైతులు పాల్గొన్నారు.
.