ఎవుసం టీవీ, జయశంకర్ భూపాలపల్లి: జాతీయ సమగ్ర ప్రకృతి వ్యవసాయ పథకం (NMNF – National Mission on Natural Farming) ఆధ్వర్యంలో కృషి సఖీలు మరియు క్లస్టర్ రిసోర్స్ పర్సన్ లకు 5 రోజుల శిక్షణా కార్యక్రమం బుధవారం ప్రారంభమైంది. ఈ కార్యక్రమానికి ముఖ్య అతిథిగా జిల్లా వ్యవసాయ అధికారి జె. బాపు హాజరై మాట్లాడారు… రసాయన ఎరువులు, పురుగు మందుల విచ్చలవిడి వాడకం వల్ల నేల సారం దెబ్బతినడంతో పాటు పర్యావరణానికి, మానవ ఆరోగ్యానికి జరిగే అనర్థాలను కృషి సఖీలకు తెలియజేశారు. అలాగే ప్రకృతి వ్యవసాయం వల్ల కలిగే లాభసాటి మెళకువలు, తక్కువ పెట్టుబడితో అధిక దిగుబడి సాధించే విధానాలను వివరించారు. అనంతరం షార్ప్ ఎన్జీఓ జిల్లా నోడల్ ఆఫీసర్ ఎం. మణికుమార్ మాట్లాడుతూ.. రసాయనాల అవశేషాలు ఉన్న ఆహారం తీసుకోవడం వల్ల తలెత్తే దీర్ఘకాలిక ఆరోగ్య సమస్యల గురించి వివరించారు. మంచి ఆహారం ఉంటేనే మంచి ఆరోగ్యవంతమైన సమాజం నిర్మించబడుతుందని అన్నారు. వివిధ మండలాల నుండి హాజరైన కృషి సఖీలు క్షేత్ర స్థాయిలో ప్రతి రైతు వద్దకు వెళ్లి ప్రకృతి వ్యవసాయం గురించి అవగాహన కల్పించి, రసాయన పురుగు మందుల వాడకాన్ని తగ్గించేలా ప్రోత్సహించాలని, తద్వారా జిల్లాలో ప్రకృతి వ్యవసాయ విస్తరణకు సహకరించాలని జిల్లా వ్యవసాయ అధికారి సూచించారు.