ఎవుసం టీవీ, ఆత్మకూరు(హన్మకొండ): ఎల్‌నినో ప్రభావంతో రాబోయే కాలంలో వర్షాభావ పరిస్థితులు, అధిక ఉష్ణోగ్రతలు నమోదయ్యే అవకాశం ఉన్న నేపథ్యంలో ఉద్యాన పంటలను కాపాడుకునేందుకు రైతులు అప్రమత్తంగా ఉండాలని ఉద్యానవన,వ్యవసాయ శాఖ అధికారులు సూచిస్తున్నారు.హన్మకొండ జిల్లా ఆత్మకూరు మండలం అగ్రంపహాడు గ్రామంలో పరకాల డివిజన్ ఉద్యాన శాఖ ఆధ్వర్యంలో గురువారం రైతులకు శిక్షణ కార్యక్రమం నిర్వహించారు. ఈ సందర్భంగా జిల్లా ఉద్యాన అధికారి పి. కమలాకర్ రెడ్డి మాట్లాడుతూ.. వర్షాభావం, అధిక ఉష్ణోగ్రతల వల్ల మామిడి, ఆయిల్‌ పామ్, అరటి, మిరప పంటలకు నష్టం జరగకుండా డ్రిప్, మల్చింగ్, సేంద్రియ ఎరువులు వాడాలని సూచించారు. పరకాల డివిజన్ ఉద్యాన వన శాఖ అధికారి సునీల్ కుమార్ మాట్లాడుతూ.. ఎల్‌నినో సమయంలో ఉద్యాన పంటల్లో తీసుకోవాల్సిన యాజమాన్య పద్ధతులపై రైతులకు వివరించారు. ప్రతి రైతు తమ పొలంలో నీటి యాజమాన్యంపై ప్రత్యేక దృష్టి పెట్టాలని, ప్రభుత్వం అందిస్తున్న డ్రిప్ పరికరాల సబ్సిడీ, మల్చింగ్ షీట్లను సద్వినియోగం చేసుకోవాలని కోరారు. ఆయిల్‌పామ్ లో అంతర పంటలు వేయడం ద్వారా అదనపు ఆదాయం పొందవచ్చని తెలిపారు.జెవిఆర్ పరిశోధన స్థానం శాస్త్రవేత్త డా. ఏ. ప్రశాంత్ మాట్లాడుతూ..* నేల పరీక్షల ఆధారంగా సమతుల్య ఎరువులు వాడాలని, నీటిని పొదుపుగా వాడాలని తెలిపారు.అనంతరం అధికారులు ఆయిల్‌పామ్ తోటల్లో అంతర పంటలుగా సాగు చేస్తున్న లిల్లీ, అరటిని పరిశీలించి రైతులకు సూచనలు చేశారు.ఈ కార్యక్రమంలో అక్కంపేట సర్పంచ్ ముద్దం సాంబయ్య, అగ్రంపహాడ్ సర్పంచ్ గంగుల మహేందర్, సీతారాంపూర్ సర్పంచ్ పెండ్లి రాజు, వ్యవసాయ విస్తరణ అధికారి ప్రవళిక, ఉద్యానశాఖ విస్తరణ అధికారి దేవేందర్, ఆయిల్‌పామ్ ఏరియా మేనేజర్ ప్రవీణ్ కుమార్, అరుణ్, రంజిత్, రైతులు పెండ్లి శంకర్, రాదరపు రాజు, యశాల రవీందర్, సంజీవ రెడ్డి, అనంత రెడ్డి, ప్రతాప్ రెడ్డి తదితరులు పాల్గొన్నారు.