వెలుగులోకి పూర్వకాలపు బంగారు పెసర్లు

ఎవుసం టీవీ, అసిఫాబాద్: కొమురంభీం అసిఫాబాద్ జిల్లా కెరమెరి మండలం పర్దా గ్రామ పరిధిలో అరుదైన, పూర్వకాలపు పెసర రకం వెలుగులోకి వచ్చింది. ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయానికి చెందిన తెలంగాణ రైతు విజ్ఞాన కేంద్రం శాస్త్రవేత్త (అగ్రానమి), కోఆర్డినేటర్ డా. ఎం. మధు గ్రామంలో పర్యటించిన సందర్భంగా పసుపు రంగు గింజలను ఉత్పత్తి చేసే అడవి, ప్రాచీన పెసర రకాన్ని గుర్తించారు.వృక్షశాస్త్రపరంగా విగ్నా రేడియేటా (Vigna radiata)కు చెందిన ఈ రకాన్ని చారిత్రకంగా ‘గోల్డెన్ గ్రామ్’ (బంగారు పెసర్లు)గా పేర్కొంటారని డా. మధు తెలిపారు. ప్రస్తుతం వాణిజ్యపరంగా విస్తృతంగా సాగు చేస్తున్న పెసర రకాలు ప్రధానంగా ఆకుపచ్చ రంగులో ఉంటాయని, అయితే కొండలు, గుట్టల ప్రాంతాల్లోని గిరిజన సమాజాల్లో సంప్రదాయంగా సాగు చేస్తున్న కొన్ని స్థానిక రకాల్లో భిన్నమైన వర్ణ వైవిధ్యం కనిపిస్తుందని పేర్కొన్నారు.ఆకుపచ్చ పెసరతో పాటు పసుపు, నలుపు రంగు గింజలు కలిగిన పెసర రకాలు కూడా కొన్ని ప్రాంతాల్లో అరుదుగా సాగులో ఉన్నాయని తెలిపారు. ఇవి కేవలం సంప్రదాయ పంటలుగా కాకుండా, పంటల్లో జన్యు వైవిధ్యానికి విలువైన వనరులుగా ఉపయోగపడే అవకాశం ఉందన్నారు.ఇలాంటి పురాతన, స్థానిక పంట రకాలను గుర్తించి సంరక్షించడం ద్వారా భవిష్యత్‌లో చేపట్టే వివిధ పంటల అభివృద్ధి, బ్రీడింగ్ కార్యక్రమాలకు ఉపయోగపడే లక్షణాలను వెలికితీయవచ్చని డా. మధు వివరించారు. సంప్రదాయ విత్తన సంపదను కాపాడుకోవాల్సిన అవసరం ఉందని ఆయన సూచించారు.పసుపు రంగులో ఉండే పెసర్లను స్థానికంగా ‘బాలింత పెసర్లు’ అని కూడా పిలుస్తారని,ప్రసవం అనంతరం బాలింతలు వీటిని ఎక్కువగా ఆహారంగా తీసుకుంటారని, వీటిని తినడం వల్ల తల్లుల్లో పాల ఉత్పత్తి పెరుగుతుందని స్థానిక ప్రజలు చెప్పడం జరిగిందని వివరించారు..